جريدة وإذاعة سقيفة المواسم الثقافية ثقافية ، اجتماعية ، فنية
الله يمسيكم و يصبحكم .. ..
اليوم خريفيتي حزينة شوية .. و بلا مؤاخذة اذا لقيتوا فيها ظحكة هون و لا بسمة هناك.. أمانة الله عليكم لا تنتكدوني (١) ..يعني بلا مؤاخذه تقولوش ناس بتهانيها و ناس بتعازيها. بس مثل ما بقول المثل .. اذا كبرت مصيبتك اظحكلها .. و اذا زاد همك هّويْله
هاظ بعد العصر بكيت(٢) طالعة ….بدي اجيب من الحارة من عند ابو حلمي شوية حكايا ..اولاد اولاتي (٣)..بدهم ملبس و ارواح و بسكوت و راحة .. . و انا راجعة عالدار لاكتني جارتي حفيظة ع باب دارهم ..بتكنس ب باب دارهم.. طرحت عليها السلام .. ردت علي السلام .. بس صوتها مخنوق ..بهتت (٤) بعنيها …و لاّ هني قطعة دم حمرا .. قلتها وك يا خايسة انتي بتعيطي ….وك خير بتهرولي فيهن مثل المطر .. ..حفيظة جارتي صارت تتشغنف(٥) و تشهك مثل اللي بتطلع روحه .. ..
قلتلها حطي ه المُصلحة من ايديك . …بتقدري تعمليلي شاي نشرب مع بعظ(٦) و لاّ ادّشرك لهمك و غمك من يوم ما جابتك امك..بدها تقولي روحي ..قولتها وينك .. انا مش رايحة من هون إلا بعد ما اتفشي غلك .. و تقولي شو خلاّ هالعنين الغالية تبكي مثل شمع الليل كبل ما يمدولنا الكهربا .. وك يا حفيظة .. انتي بتتذكري الكناديل السفرية اللي بكينا نظويها و احنا نسهر عالراوية .. اللي بدار سيدك علي ..انتي بكيتي بدك إتعليلها (٧) و انا بدي اوطيلها .. و انا دايما ارد عليكي بكيتي ساطية (٨) ساطية علي يمة بكيتي مكواك بتخوفي بلد بحالها .. قالت حفيظة .. بكيت .. ساق الله و انا عظهور خيلها .. اليوم حِلّنِّي اطلب من حدى حبة عدس ..و يرد علي ..
وك يا حفيظة شو في ….
قالت حفيظةُ و الدمع يهطل من مقلتيها ..
انا من أتى بها الزمان و رمى بالهم جانبيها ..
لي ولد ادمى فؤادي جحوده يا صاحبيا ..
للأم يومٌ شمسه حسبتها تشرق في راحتيا ..
لكنه ولدي الحبيب رمى بالبعد عني ناظريا
و هو الذي كان الهوى..و بذا الهوى ابدو شقيا
و لقد تنكر للهوى و مضى كأن لم يبق حيا..
..
وك يا حفيظةةةة .. هاظ انتي شاعرة و انا معيش خبر … اطلعت علي بدها توكلني هي بيش و انا بيش .. .بس ردت علي من حرقة قلبي خيتا .. و يعني لا شاعر و لا كاتبة و لا سخام بين .. هو كل من صف ثث اربع كلمات صار شاعر … بس خيتا عز علي لوووووو بكديش صارلي له اربعتشهر ما شفت رُكعة وجهو .. و الله استنيت اليوم اشوفه .. يعني بقيت اقول .. هو و مرته و اولاده ..عاليوم لو يقلطوا تلاي(٩) .. يالا بهمش .. بس اللي امحسرني انو اجت قبل شوية ام احمد و كالتلي انو عندار حماه .. حرام هي بدهاش تقول .. بس هيك زلة لسان..و تندمت انها كالت .. ..
ولا تحطي ببالت خيتا يا حفيظة .. و الله غير يهلوا عليك بين لحظة و الثانية و يوطوا يبوسوا ايدك .. و هاظ ابنك .. و لا تحطي بقلبك .. نقطة بالمصحف .. و لا بتبارك الا برضاكي عليكي و هو بعرف هيك و ولووو انه فش احسن منه .. بس غير امصعلك رقبته … و غير يمشي عالبيظ ما يكسروا .. هاظ ابصر مين دخل بعقله مخوله .. ظحكت حفيظة و راحت تحفظ الخبزات بالجونة ميشان يظلين سخنات و حطت الشاي ع الببور لانه غازها خالص .. و بعده ببورها عندها لوقت الازمات
المعاني
