مش عارفة شو أحكي لصديقتي في غزّة – دانا جودة

مش عارفة شو أحكي …

لصديقتي في غزّة..

_ لساني: صباح الخير …
_ عقلي: شو يعني صباح الخير! هاي ما بتنقال هون
_ (مسحتها)..

_ لساني: مرحبا.. يارب تكوني بخير..
_ عقلي: شو بتحاولي تعملي يعني بتمعني بالأسى؟
_ (مسحتها) …

_ لساني: مرحبا، كيفِك..
_ عقلي: هبلة إنتِ؟ شو بدو يكون كيفها؟ إيش مفروض تجاوبِك مثلا!
_ (مسحتها)…
_ لساني: طيب.. كيف كان مبارح..
_ عقلي: على أساس كان في سهرة وبتطمني انبسطت فيها ولا لأ!! شو خطرلك تسألي هالسؤال.. مالك بتلاخمي… بس فكّري شوي، شوي بس.. قبل ما تكتبي.
_ (مسحتها)..

_ لساني: طمنّيني عنك..
_ عقلي: يا حول الله.. على شو بالزبط بدها تطّمنك!! إنه إيدها لسا معها وقادرة تردّ عليكِ برسالة مثلا ولا لسا فيها نفس وربنا ما أخدها؟
_ (مسحتها)

_ لساني: طمنّيني عن صحتك..
_ عقلي: الله يجيبك يا طولة الروح…..
_ (مسحتها)
_ لساني: طمّنيني عن صحتك (خليتها غصب)
………………….
………………….

_ لساني: تمام.. بنتواصل، استودعتك ربّي!!
_ عقلي: شو هي استودعتك ربّي هاي، بتعرفي إنه أحسن وديعة حاليّا هي اللي بتطلع عند ربها وبترتاح؟ بتدعي عليها تموت يعني!!؟
_ لساني: بعيد الشر..
_عقلي: بعيد شو؟؟ 🤣🤣🤣
_ (مسحتها)
…………………..

لساني: بنتواصل، كوني بخير..
عقلي: إمسحيها بسرعة قبل ما تشوفها.. على أساس هي قادرة تاخد هيك قرار وبِدْهاش!! فضحتينا..
_ (مسحتها)

_ لساني: دير بالِك عحالك..
_ عقلي: لا يا شيخة!!
_ (مسحتها)
_ عقلي: بالمناسبة! وين قلبك ماتخلّيه هو اللي يحكي، ضروري يعني لسانك وزلّاته؟
_ قلبي انطفا.. مشلوع ومخلوع فش إله صوت..
_ عقلي: والله مش عارف شو أحكيلك.. مهو مش كل شي عليّ.. يعني بطّل إشي من اللي بصير منطقي وبشبهني، بأي لغة مفروض أحكي !
_ لساني: وليش واقفلي عالدقرة.. بدي أعرف أبعت رسالة زي الناس..
عقلي: برضو بتقول زي الناس!!
…………….

لساني: طيب يا صديقتي، بنتواصل إذا ظلّ بالعمر بقيّة.. باي.

آسفة عنجد مو عارفة شو أحكي….
…………….