جريدة وإذاعة سقيفة المواسم الثقافية ثقافية ، اجتماعية ، فنية
أم الطل وصحن الكعك والحاره
ما سمعت الا صوت ام الطل معبي الحاره يماااااا يا ريماااا
رديت وانا مو دايره وجهي ..بركض على طول عزمي بلهت من الفرحه وانا سامعه ام الطل وك يما على مهلك .لويش العجله ..يما الله يرضى عليك اصحك تكسري صحن الكعك تاع خالتك ام حسن وام ادهم خساره يما..خلي فرحه عيدنا تدخل بيوتهم زينا .. رديت وقلبي برف معجوقه ..لا يما ما تخافي ماسكته منيح ما رح يوقع ..سامعه صوت امي وانا بركض مبسوطه لبيوت جيرانا ..اه كلهم اسلام وبيتنا الوحيد المسيحي ..بركض اوزع البيض الملون والكعك… ..السكر عبى ايدي والفرحه ملت قلبي وانا واحمد وسامر منتسابق نوزع الكعك وك احمد يا بطيخه امسك صحنك كويس سامع امي كيف خايفه .. ..اه يما سامعه صوتك بعدني لهلا اه بعدني حامله في قلبي صوره حارتي وصوره ايديك وانت بتبسي معهم وانت بتلف ورق الدوالي لعزيمه اخو ام بسام وانت بتخيطي مراييل المدرسه لكل بنات حارتي صوره ماكنه السنجر وام محمد..داخله بيتنا في بكرج القهوه ..يعطيك العافيه يا ام طلال هسا دور بناتي رائده ورويدا …حارتي الدافيه ..بيوتها البسيطه…..فوق ال ٣٠ ولد وبنت ..كلنا عيله وحده ..صوتك يما لهلا في ذاني وبعدني ماسكه الصحن كويسسسس ومقرمطه فيه …لا يما ما رح افرط في الصحن و صوره ابوي وانت وانتو من الصبح معجوقين في زينه باب بيت عمي ابو احمد عقل..منظر ابوي ما بموت من خيالي وهو يقطع من نخلتنا ليزين جيه ادهم وأمه من الحج .حجا مبرورا وسعيا مشكورا وانا وسامر وعمر إخوانه منخطط..على باب البيت ..ما رح امحي صوره خالتي ام ادهم وانا واولاد حارتي متجمعين حوليها..انا ..انا ..انا يا خالتي ام ادهم صورتها وهي تعطينا..هدايا حلوه ومسبحات و خراخيش حلوه من الحج وتغاوز معي وتعطيني اكثر وحده ..لااااا ما رح تخلوني في قصصكم الطرمه امحي قصه عمي ابو الوليد الحلاب من راسي قد ما حكتها الي امي كل مره وهي في الغربه تحن للزرقاء وقصص الطفر في بيتنا ….والله يما يا ريما مستحيل انسى هيك انسان عمك ابو الوليد..لا من دمنا ولا من دينا و حلف مليون الف حلفان ما يقطع اخوك من الحليب وهو بوبو زغير ابوك مكانش بشتغل ومعيش النكله ادفعله..وتجمع علينا مبلغ كبير …بلاش يا ابو الوليد الحليب اليوم بدناش حليب ..ليش يا ام طلال ليكون لقيته حلاب تاني .ولو يا ابو الوليد معقوله نشتري من غيرك بس .صراحه ابو طلال بلا شغل ومعيش ادفعلك .ولو يا ام طلال .بسيطه وقعت قلبي و.ابنك فؤاد.. متل ابني وليد معقول اقطعه من الحليب كرمال كم قرش .بس هيك خجلتنا ولو يا مره .بعتبر البقره دزت سطل الحليب بأجرها وكله وقع ..علي الطلاق بزعل منك لو ما قبلت مني الحليبات ولو يا ام طلال احنا أهل وابنك ابنا ..عادتها علي القصه مليون مره وبظل اعيدها مليون مره ..قصه مستحيل تموت من جواي …وك من وين طلعتو انتو ..في الرحمه ؟؟؟وك لما ماتت عمتي دموع حارتي على عمتي نورا اكتر من دموع.. ابوي وامي
الله يرحمها يا ابو طلال حزنكم حزنا ..وميتكم ميتنا .الله يرحمها وقتها الكل زعل معنا و.حدت الحاره معنا وخطبه سوزان بنت ام حسن كرمال الجيره اجلوها …
معقوله انتووووو من وين طلعتووووو ؟؟؟
بنساش هاضاك اليوم يابا يابا ….نجحت في التوجيهي .ركضت لبيت خالتي ام ادهم اتصل من تلفونهم ..كانو البيت الوحيد الي عندهم تلفون وكل أقرع وابو طاقيه استلمهم متل حالاتي ..معليش يا خالتي ام ادهم ابشر ابوي في نجاحي ..وقتها اتصلت فيه في وحدته في الجيش ..يابا سامعني..يابا يابا حبيت ابشرك نجحت نجحت ..فرحه ابوي وهو في معسكر الزرقاء فرفحت قلبي لما رجع في علب ربنا من السلفانا وحطها قدامي ..شو هاذا يابا .؟؟؟كتير هيك .والله يابا هدول مو مني اعمامك ابو محمود وابو فيصل..والبقيه فرحو اكتر مني و قعدو يرشو ويوزعو حلوانك في المعسكر والله يما بعدني حامله الصحن ومستحيل ينكسر …لاااااااا يما حامله الصحن كويس ما رح اكسره ولا اكسر صوره ادهم ابن عمي ابو أحمد وهو راجع من جامعته ملتعن اساسه وهو يشرح الي الآيات القرانيه في كتاب العربي يخوي شو معنى رب العالمين اشرحلي هاي ….وك مين انت وهي لتطخو. على شيرين وتصلبوها اكتر من مره وك .ما رح تمحو صوره.حارتي وفرحه فاتنه واختي حوليها في عرسها وهي معها في زفتها دخله الجاهه وابوي واقف مع ابوها كتف في كتف وامي تحوس مع ام ادهم يصبو كاسات العصير .يا رولا انا وحيده مليش خوات وانت اختي كملي مع الزفه في طلعتي لاربد ..اه يما روحي معها لا تتركيها حرام ملهاش خوات بنات ..وك .لااااااا ما رح تقدرو تلغو عرس فاتنه من جواي صوره جاراتنا اخر زاروبتنا ملتمين ململينا حوليهم وكل يوم وكل مسا..الضحكه على وجههم لا دارسات ولا متعلمات.ولا بطيخ ويا دوب يفكو الحرف متجمعات..بس ليسولفو ويشكو همومهم سوى ..ومين عزلت بيتها ..وكيف طلعت طبختها ومين ما استوت رزاتها…عمره ما كان همهم مسيحي انت ولا مسلم ولا درزي ..همهم شو بكره يطبخونا….
قطعتو قلبي وانتو بتمزعو ايقونه حاراتنا وفسيفاء جمعتنا همها اللقمه وشقفه قماشه تسترنا
صوت التكبيرات وقت العيد نصحا عليها كلنا
بكره العيد ومنعيد ومنذبح بقره شحيد وشحيد مالو بقره منذبح بنته هالسمره .والسمره ما عندها دم منذبح بنتها بنت العم .صوتي يغني مع بنات حارتي لعيد الفطر صوت التراويح وصوت المؤذن ابو اسماعيل ما رح ينمحى من راسي
صوت المسحر وطبلته وهو يدق على بابنا ..كل سنه وانت سالم عمي ابو طلال .تنساش عيدتي …يابا ريما الله يرضى عليك روحي اتناولي جزداني من بنطلوني وتعالي لعندي
يناوله النصيب بعد ما يفطره
وك مين انتووووووووووو
لا انتووووووو مو منا ..مش منا ..انتو مو من حارتي ..ما عرفتو تحملو صحن الكعك منيح وقعتوه وكسرتوه وتعبى وسخ
وك بلاششش تترحمو بلاششششش صوتكم دوشنا .صوتكم قرقعنا .خلو شيرين تنام في هدوء ..وك ازعجتوها وانتو مع الي ما يتسمو بتهزو نعشها وبدكم توقعوه
لا ما رح يوقع
لا ما رح يوقع ولا رح يوقع نعشها ولا رح تكسرو الصحن الكعك منا
خلص خلص دوشتونا ….خلو شيرين تنام في هدوء..
أم الطل وصحن الكعك والحاره – ريما نايف حماتي
