جريدة وإذاعة سقيفة المواسم الثقافية ثقافية ، اجتماعية ، فنية
والله لو كانوا جبل لتصدع .
_______________________
أنا طبعا لا يمكن أحكي باسم أهل غزة لأني أصغر بكثير من إني أحكي باسمهم.
لكن أهالي غزة ماتوا و تبهدلوا مش فرحانين بالتحليلات السياسية ولا عندهم كهرباء أصلا حتى يسمعوها ولا بيهمهم أبدا تقولوا عنهم منتصرين ومعجزة، ولا هم بحاجة حدا يحكي عنهم ابطال، ذوي بأس, جبارين و من هذا الحكي ولا هم أسطورة و لا فرحانين كثير بكلمة الله يحيي صمودهم ونيالهم صامدين ..هدول ناس محبوسين بقفص والقصف جايهم من كل الجهات كيف بيكونوا صامدين؟!
هدول صابرين ونقطة. فرق كبير بين الصبر والصمود ..أنت بتكون صامد لما يكون عندك خيارات متعددة وتختار الصمود
هدول ما بدهم شيء غير ايقاف هذه الابادة والمحرقة اليومية، مافي ناس تكفي لاخراج الشهداء من تحت الأنقاض ولا اخراج الجرحى، في صبية طلعت من تحت الردم بتقول أهلها من 7 ايام تحت الردم ما في مين يطلعهم والصفحات يكتبون عنهم شهداء والبنت رح تجن هي متأكدة انهم عايشين وحكت معهم.. وقيسوا على هيك ظروف مأساوية قصص وحكايا .
ولك يا ناس يااااا هوووووو يا الله ماحدا منهم سلم من القصف.. والله ما ضل حدا منهم ما خسر ولااا حدااا ، خسروا كل شيء .
وحياة الله هدول فلسطينية أقسم بالله فلسطنية أقحاح يا كل عرصات العالم وأولهم عرصات القرار الفلسطيني .
وكمان غزة مدينة فلسطينية يا عالم يا الله والله غزة مو من المريخ .
ولكوووووو وينكم عنا 45000 شرطي فلسطيني و 14 تنظيم زفت كان عندهم هدف بالزمانات تحرير فلسطين ما سمعنا صوت حدا تمرد وانشق كله حكي ولعي وتنظير كأنه اللي عم يموتوا مو فلسطينية .. والله هاي أخر فرصة وبعدها على فلسطين السلام ، بعرف كثار ما عاجبهم الكلام لكن هذه هي الحقيقة .
ولكوووووو شو اللي صار فينا كيف صرنا شعب مدجن جبان على أرض الواقع لكن أبطال على مواقع التواصل الاجتماعي و بكل مكان، و بالهتاف شاطرين بالروح بالدم نفديك يا فلسطين، نفديك يا غزة ، يعني أهل غزة شو بدهم فينا نطلع نهتف ونغني و نلبس الكوفية و نحمل العلم و نهتف لفلسطين ولكووووو هاي الناس الثانين الأغراب بيعملوها و بيطلعوا يتضامنوا معنا مش نحنا اللي بدنا نتضامن مع حالنا ..هدول حالنا، هدول نحنا.. نحنا لازم يكون دورنا شي ثاني وغير اللولحة بالكوفية والعلم .
وين الجمعيات اللي بأوروبا وعندهم أصدقاء من برلمانات وشخصيات مهمة ؟! ليش ما يطالبوا بلقاءات واجتماعات مع شخصيات سياسية مؤثرة ويعملوا مؤتمرات صحفية وكثير شغلات و يرفعوا مطالبات مكتوبة وينشروها بكل العالم
وين الحقوقين العرب اللي وصلوا لأعلى المستويات بالمنظمات الدولية وممكن يأثروا ؟!
اذا السلطة الفلسطينية خاينة و عميلة و عرصة طيب وين التنظيمات وين المساندة ؟!
دخيل الله شو صار بالشعب الفلسطيني كيف هيك صرنا نحنا مثل الغنم ؟! كيف كله خايف كله عم يحسب حساب لكل شي
وشو نهاية الخوف والحسابات، لا أستثني نفسي أنا أزفت منكم جميعا .
يا ريت قادرة أحكي شي لأهل غزة يا ريت أنا أول الميتين يا رب لا تسامحنا كلنا .
